Европа Иттифоқи Россияга қарши жорий этилган санкцияларнинг 18-пакети доирасида Россия тўғридан тўғри инвестициялар фонди (РФПИ) ва унга тегишли субфондлар, компаниялар ҳамда молиявий хизмат кўрсатувчи шахсларни «қора рўйхат»га киритди. Бу ҳақда Европа Кенгаши 18 июл куни эълон қилган баёнотда маълум қилинди.
РФПИ 2011 йилда Россия давлат хазинаси маблағлари ҳисобига 10 млрд доллар капитали билан ташкил этилган ва 2016 йилда расман «суверен фонд» мақомини олган. Унинг асосий вазифаси — Россия иқтисодига хорижий инвестицияларни жалб қилиш бўлиб, айни пайтгача 40 млрд доллар миқдорида инвестиция киритилгани айтилган. Фонд «Магнит», «Фосагро», «Полюс» ва «Лента» каби йирик компаниялар акцияларига сармоя киритган.
Европа Иттифоқи санкцияларини кенгайтириб, энди ушбу фонд сармоя киритган компанияларга ҳам чекловлар қўллаш механизмларини ишга туширмоқда. РФПИнинг инвестиция портфели умумий ҳисобда 2 трлн рублга яқин экани маълум қилинган. Бу чекловлар Россиянинг халқаро молия бозорларига чиқиш имкониятини янада чеклайди.
РФПИга 49 ёшли Кирилл Дмитриев раҳбарлик қилади. У президент Путинга яқин шахс сифатида танилади, чунки у Путиннинг қизи Екатерина Тихонованинг яқин дугонаси билан турмуш қурган. Дмитриев шунингдек, Доналд Трамп маъмурияти билан мулоқот қилиш учун жорий йил бошида Путин томонидан махсус гуруҳга ҳам киритилган эди.
Санкциянинг бу босқичида 22 та Россия банки, SWIFT тизимидан узилган молиявий ташкилотлар ва Хитой, Туркия ҳамда Ҳонгконгдаги айрим санкцияларни айланиб ўтишга ёрдам берган компаниялар ҳам ўз жойини топди. Европанинг ташқи сиёсат раҳбари Кая Каллас ушбу пакетни «уруш бошидан бери энг кучли санкция тўплами» деб атади.