2025 йил 21 июл куни Тошкент шаҳар ҳокимлигида ҳоким Шавкат Умрзоқов Хитойнинг йирик девелопер компанияси — Chongqing Guangtian Real Estate Development Co., Ltd раиси Ли Тао билан учрашди.
Учрашув чоғида томонлар Тошкентда кўчмас мулк соҳасида инвестиция лойиҳаларини амалга ошириш, ҳамкорликнинг ҳуқуқий ва амалий асосларини муҳокама қилишди. Хусусан, узоқ муддатли стратегик шериклик ўрнатишга ўзаро қизиқиш билдирилди.
Таъкидланишича, Ўзбекистон президенти Шавкат Мирзиёевнинг очиқ ва қулай инвестиция муҳитини яратишга қаратилган сиёсати пойтахтни халқаро сармоячилар учун тобора жозибадор ҳудудга айлантирмоқда.
Маълумот учун, Chongqing Guangtian Real Estate Development Co., Ltd 2001 йилда ташкил этилган ва шу вақт мобайнида Хитойда умумий майдони 5 миллион метр квадратдан зиёд бўлган турли турар жой ва тижорат объектларини қуришни амалга оширган. Компания таркибида 3000 дан зиёд мутахассислар ишлайди ва у вертикал интеграция қилинган ривожланган тузилмага эга.
Томонлар музокараларни ишчи форматларда давом эттиришга келишиб олдилар. Ушбу ҳамкорлик Тошкентда қурилиш, шаҳарсозлик ва инфратузилмани ривожлантириш соҳаларида янги имкониятларни очиши мумкин.