Иқтисодчи Миркомил Холбоевнинг таъкидлашича, апрел ойигача сўмнинг кунлик ўзгариши 25 сўмдан ошиб кетмаган бўлса, апрелдан сўнг бу чеклов доимий равишда бузила бошлади. Ушбу ҳолат Халқаро валютa жамғармасининг миллий валюта курсини эркинлаштиришга доир тавсиялари билан боғлиқ бўлиши мумкин.
Шу билан бирга, сўмнинг долларга нисбатан умумий барқарорлиги ҳам қайд этилмоқда. Жорий йил июл ойида сўм бироз мустаҳкамланиб, ойлик ўсиш 0,05 фоизни ташкил этди. Январ ойига нисбатан эса 2,4 фоизлик мустаҳкамланиш кузатилди.
Сўмнинг барқарорлигига бир нечта омиллар таъсир кўрсатмоқда. Биринчидан, долларнинг глобал пасайиши ва жаҳон бозорида олтин нархининг ошиб бориши экспорт ҳажмини оширди. Иккинчидан, Россия рублининг мустаҳкамланиши фонида пул ўтказмалари ҳам кутилганидан юқори суръатда ўсди.
Учинчидан, инвестиция оқимлари ҳам сўмга ижобий таъсир кўрсатмоқда. Хусусан, 2024 йилнинг биринчи чорагида тўғридан тўғри хорижий инвестициялар ҳажми икки баробар ошди. Бу эса валюта бозоридаги талаб ва таклиф мувозанатини сақлашга ёрдам берди.
Натижада, курсдаги техник тебранишлар кучайганига қарамасдан, умумий барқарорлик сақланмоқда. Экспертларнинг фикрича, бу тенденция сўмнинг бозор шароитида эркин ҳаракатланаётганидан далолат беради.