Экология, атроф-муҳитни муҳофаза қилиш ва иқлим ўзгариши вазирлигига Sea Breeze Uzbekistan лойиҳаси бўйича Экология вазирлигига ҳали расмий ҳужжатлар келиб тушмаган. Бу ҳақда вазир— бош экологик инспектор Азиз Абдуҳакимов маълум қилди.
«Бу ҳозир, очиғини айтганда, фақатгина бизга норасмий равишда оғзаки айтиляпти. Шунинг учун биз илтимос қилдикки, ҳужжатни олиб келсин. Ҳужжат бўлгандан кейин биз ўзимизнинг ҳам, Қурилиш вазирлиги, Сув хўжалиги, ўзининг тегишли инспекциялари, Экологик экспертиза маркази, ҳамма тегишли вазирлик ва идоралар ўзининг эътирозларини ёки ўзининг таклифларини билдира олади», — деди Абдуҳакимов.
Унинг сўзларига кўра, ҳужжатлар тақдим этилса, барча тегишли идоралар ўз муносабатини билдириши ва жамоатчилик муҳокамаси ташкил этилиши таъминланади.
«Ҳозир ҳали ҳужжат йўқ, биз «йўқ, бўлмасин», деб турибмиз-да. Ўзи ҳужжат келсин олдин. Бир нарсага ўзи «йўқ» дейишдан олдин шу нарса пайдо бўлиши керак-да. Ҳали бизда таклиф ҳам йўқ, ҳужжат ҳам йўқ, лекин биз «йўқ» деяпмиз. Уни келгандан кейин биз, албатта, жамоат муҳокамасига қўямиз, ҳамма кўрсин шуни. Уни қанақадир беркитиб, кечаси шундай қўл қўйиб чиқариб юборадиган, менимча, ҳеч ким йўқ ўзи республикада», — дея қўшимча қилди у.
Абдуҳакимов лойиҳани амалга ошираётган девелопер — Эмин Агаларовнинг тажрибасини таъкидлаб, унинг қурилишлари экологик стандартларга жавоб беришини қайд этди. Шунингдек, вазир Агаларовга Қирғизистон, Қозоғистон ва Черногория каби давлатлар ҳам қизиқиш билдирётганини маълум қилди.
«Республикага таклиф этилган девелопер ўзидан-ўзи келиб унақа қилмаяпти бу ерда. Келиб, ўзидан-ўзи «Мана, мен шу Чорвоқда қураман», деган гап йўқ. Уни, аксинча, тажрибали бўлганлиги учун, у жуда ҳам бир экологик стандартларга жавоб берадиган қурилишларни қилганлиги учун ҳам Ўзбекистонга таклиф этиляпти. Бўлмасам, ўзининг жуда унақа бир катта хоҳиши йўқ, унинг мингта таклифи бор», — деди Абдуҳакимов.
Sea Breeze Uzbekistan номли офиснинг Тошкентда очилгани ҳақида вазир ОАВ орқали хабар топганини айтди. Ушбу офис ҳозирча фақат хориждаги уй-жой лойиҳаларидаги квартираларни сотишга оид бўлиши мумкинлигини таъкидлади. Матбуот анжумани якунида вазир жамоатчиликни шошма-шошар қарорлар қабул қилмасликка чақирди. «Келган ҳужжатни кўрмасдан туриб рад этиш — ақлга тўғри келмайдиган иш», — дея хулоса қилди у.