Dunyo агентлигининг хабар беришича, Куала-Лумпурда Ўзбекистон элчиси Каромиддин Ғадоев билан Tenaga Nasional Berhad президенти Мегат Жалолиддин бин Ҳасан ўртасида учрашув бўлиб ўтган. Томонлар энергетика соҳасидаги ҳамкорлик истиқболларини муҳокама қилган.
Tenaga Nasional Berhad компанияси электр энергиясини ишлаб чиқариш, узатиш ва тақсимлашда тўлиқ ишлаб чиқариш занжирига эга. Ушбу тажриба Ўзбекистон энергетика тизимига жорий этилиши фойдали бўлиши таъкидланган.
Компанияга республика тоғли ҳудудларида кичик ва ўрта гидроэлектростанциялар қуриш таклифи берилган. Шунингдек, электр тармоқларини ривожлантириш ва модернизация қилиш лойиҳаларида ҳам иштирок этиш тавсия этилган. Лойиҳалар давлат-хусусий шериклик асосида амалга оширилиши режалаштирилмоқда.
Мегат Жалолиддин бин Ҳасан таъкидлашича, тақдим этилган таклифлар компания мутахассислари томонидан ижобий кўриб чиқилади. Ушбу масалаларни муҳокама қилиш учун масъул шахс тайинланади.
Маълумот учун: Tenaga Nasional Berhad 1949 йилда ташкил этилган бўлиб, Жануби-Шарқий Осиёдаги энг йирик энергетика компанияларидан бири саналади. Унинг 45 фоиз акциялари Малайзия ҳукумати назоратидаги фондларга тегишли. Компания электр энергиясини ишлаб чиқариш ва тақсимлаш, электростанцияларни таъмирлаш ва синовдан ўтказиш, муҳандислик ва қурилиш хизматлари кўрсатиш ҳамда кўмир қазиб олиш фаолиятлари билан шуғулланади.