2025 йил 24 июл куни Россиянинг Амур вилоятида юз берган авиаҳалокат оқибатида кўплаб фуқаролар ҳалок бўлди. Ушбу фожеа муносабати билан Ўзбекистон Республикаси президенти Шавкат Мирзиёев Россия Федерацияси президенти Владимир Путин номига расмий таъзия мактуби йўллади.
Давлат раҳбари ҳалокат қурбонларининг оила аъзолари ва яқинларига чуқур ҳамдардлик билдирди.
Маълумотларга кўра, самолёт Хабаровск — Благовешченск — Тинда йўналиши бўйича парвоз қилган ва Тинда аэропортига қўниш пайтида иккинчи айланмага ўтиб, радарлардан ғойиб бўлган. Маҳаллий вақт билан тахминан соат 13:00 да алоқа узилган. Қолдиқлар Тиндадан 15 километр узоқликдаги тоғ ёнбағрида аниқланган. Бортда 43 нафар йўловчи, жумладан 5 нафар бола ва 6 нафар экипаж аъзоси бўлган. МЧС ҳаводан олиб борилган текширувлар жараёнида омон қолганларни аниқлай олмаган.