2025 йил 22 июл куни Вазирлар Маҳкамаси “Ер қаъридан фойдаланиш қоидаларини бузиш ҳолатлари ҳақида хабар берган жисмоний шахсларни рағбатлантириш тартиби тўғрисида”ги 457-сонли қарорни қабул қилди.
Қарорга асосан, шахслар видеотехника воситалари орқали ер қаъри билан боғлиқ ҳуқуқбузарлик ҳолатларини тасвирга олиб, “Геомониторинг” ахборот тизими орқали Тоғ-кон саноати ва геология соҳасини назорат қилиш инспекциясига юбориши лозим.
Юборилган материалларда қонунбузарлик ҳолати, уни содир этган шахс тўғрисидаги маълумотлар (агар мавжуд бўлса), воқеа содир бўлган жой, сана ва вақт аниқ кўрсатилиши шарт. Материаллар 15 иш куни ичида кўриб чиқилади.
Фойдали қазилмаларни ноқонуний қазиб олиш ёки ташиш ҳолатлари бўйича хабар берган шахслар ҳуқуқбузардан ундирилган маблағлар ҳисобидан БҲМнинг 1 баравари миқдорида рағбатлантирилади. Минерал хомашёни қайта ишлаш каби бошқа ҳуқуқбузарликлар учун эса жарима миқдорининг 5 фоизи тўлаб берилади.
Бу орқали нафақат фуқароларнинг фаоллиги ошиши, балки геологик ресурсларни муҳофаза қилишда жамоатчилик назоратининг кучайиши кутилмоқда.