Россия ва Украина президентларининг учрашуви Киев таклиф қилганидек, август ойи охиригача бўлиб ўтиши эҳтимолдан узоқ. Бу ҳақда Россия Президенти матбуот котиби Дмитрий песков маълум қилди, дея ёзмоқда Медуза.
«Олий даражадаги учрашув музокаралар якунига нуқта қўйиши ва экспертлар иши давомида ишлаб чиқилиши лозим бўлган келишувларнинг шартларини белгилаши мумкин ва керак. Буни тескарисига қилиб бўлмайди. Шундай мураккаб жараённи 30 кун ичида якунлаш мумкинми? Аниқ айтиш мумкинки, бу жуда қийин», — деди Россия президентининг матбуот котиби Дмитрий Песков брифингда.
Кремль вакили, шунингдек, Россия ва Украина делегациялари музокараларнинг иккинчи босқичида алмашган меморандумлар лойиҳалари «бир-бирига бутунлай қарама-қарши» эканини таъкидлади. «Уларни қисқа вақт ичида мувофиқлаштириш имконсиз, бунинг учун жуда мураккаб дипломатик ишлар олиб бориш зарур», — дея қўшимча қилди у.
Истанбулда 23 июл куни ўтказилган Россия-Украина музокараларининг учинчи босқичи якунига кўра, Киев делегацияси август ойи охиригача Владимир Путин ва Владимир Зеленский ўртасида шахсий учрашув ўтказишни таклиф қилган. Ушбу учрашувда Ражаб Тойиб Эрдўған ва Доналд Трамп ҳам иштирок этишлари мўлжалланган.
Украина президентининг таъкидлашича, Россия-Украина музокараларида узоқ вақтдан кейин биринчи марта Кремл томонидан раҳбарлар учрашувининг имконияти ҳақида ишора берилди. «Биз раҳбарлар даражасидаги учрашув масаласини доимо ошкора тарзда кўтариб келганмиз. Энди улар ҳам биз билан суҳбатда бу ҳақда гапира бошладилар. Бу аллақачон маълум бир учрашув форматига томон ҳаракат», — деди Зеленский Украина оммавий ахборот воситалари билан суҳбатда.