Ўзбекистонда 2025 йилнинг июн ойида енгил автомобиллар импорти сезиларли даражада камайди. Давлат статистика қўмитаси маълумотларига кўра, ой давомида мамлакатга 5968 та авто келтирилди. Бу эса дона ҳисобига май ойига нисбатан 5,3 фоизга камайишни англатади. Импорт суммаси эса 96,8 млн долларни ташкил этди — 13,2 фоиз пасайиш.
Умуман, жорий йилнинг I ярмида Ўзбекистон 24 минг 355 та енгил автомашина импорт қилган бўлиб, умумий қиймати 422,1 млн долларга етди. Улар орасида электромобиллар катта улушга эга: 6 ойда 14 минг 356 та электр моторли авто олиб кирилди, фақат июн ойининг ўзида улар сони 4567 тани ташкил этди — бу ойлик импортнинг 76 фоизини ташкил этади.
Автомобил импорт бозорида Хитой мутлақ етакчи сифатида қолмоқда. Чин ўлкасидан 6 ой ичида 21 минг 390 та машина келтирилган, бу умумий импортнинг 87,8 фоизини ташкил этади. Июн ойида эса Ўзбекистонга олиб кирилган 5968 автомобилнинг 5526 таси — тахминан 93 фоизи Хитойдан келтирилган.
Иккинчи ўринни эгаллаган Жанубий Кореядан йил бошидан буён 2032 та авто келтирилган. Бироқ июнда бу мамлакатдан фақат 150 та авто олиб келинган — бу май ва апрелга нисбатан анча кам. Учинчи ўринда эса Ҳиндистон турибди: 168 та авто етказиб берилган, аммо май-июн ойларида импорт тўхтаган.
Қолган етказиб берувчилар — АҚШ ва Япониядан 145 тадан авто келтирилган. Бошқа давлатлар ҳиссаси жами 466 авто билан чекланган. Бензинли автомобил импорти июнда умумий ҳажмнинг тўртдан бир қисмига ҳам етмаган.
Аввалроқ 2025 йилнинг биринчи ярмида Ўзбекистонда енгил автомобиллар савдоси 23 фоизга пасайгани, бироқ электромобиллар сегментида кескин ўсиш кузатилгани ҳақида маълумот берилган эди.