The Washington Post нашрининг ёзишича, ушбу схема АҚШ президенти Доналд Трамп ташаббуси билан йўлга қўйилган. Украина президенти Володимир Зеленский аввалроқ Киев Patriot тизимларининг камида 10 тасини шундай тартибда олишга умид қилганини айтган эди.
21 июль куни Украина иттифоқчилари учрашувида Германия мудофаа вазири Борис Писториус Берлин бешта Patriot тизимини етказишда ёрдам бериш ниятида эканини билдирган, лекин тафсилотларни ошкор этмаган. Маълумотларга кўра, шулардан учтаси Украинага аллақачон етказиб берилган, қолган иккитаси бўйича музокаралар давом этмоқда.
Washington Post манбасига кўра, Patriot тизимлари НАТОга аъзо бўлмаган давлатлардан ҳам келиши мумкин. Жумладан, Швейцария мудофаа вазирлиги аввал АҚШдан буюртма қилинган 5 та Patriot тизими вақтинча Украинага юборилишини маълум қилган. Бу орқали АҚШ Швейцарияга бўлган етказиб беришни кечиктирган ҳолда Киевни қўллаб-қувватламоқда.
Литва ҳам Украинага ракета қурол-яроғларини ёрдамини кучайтириш мақсадида 30 миллион евро ажратиш ниятида эканини маълум қилди. Вильнюс АҚШ тизимларини жамоавий харид қилиш дастурига қўшилишини билдирган.
Бундан ташқари, Украинага узоқ масофали ракеталар етказиб бериш бўйича ҳам музокаралар олиб борилмоқда. Германия Taurus қанотли ракеталарини беришдан бош тортган бўлса-да, The Washington Post НАТО дипломатлари АҚШ томонидан бундай ракеталарни бериш эҳтимолини истисно қилмаётганини ёзади.
14 июл куни Доналд Трамп НАТО иттифоқчилари ҳисобидан 17 та Patriot тизими Украинага бериш режаси борлигини эълон қилган эди. Бу режа «Рамштайн» форматидаги Украина Мудофаа контакт гуруҳи йиғилишида ҳам қўллаб-қувватланган.