Ўзбекистонда 2025 йил февралида авиачипталар нархи 22,4 фоизга ошган. Бу ҳақда Рақобатни ривожлантириш қўмитасининг аксилмонопол назорат ва нархлар сиёсати бўлими раҳбари Комилжон Давлатов Kun.uz сайтига берган интервюсида маълум қилди. Унинг сўзларига кўра, кейинги ойларда бу ўсиш қисман босилган.
У авиаёнилғи авиачипта нархининг ярмидан кўпини ташкил қилишини таъкидлади. Мавжуд муаммолар Президент Администрациясида муҳокама қилинган ва чипта нархларини пасайтириш бўйича таклифлар киритилган. Давлатовнинг таъкидлашича, авиакомпаниялар ички рейслар сонини оширишдан манфаатдор эмас, чунки бу йўналишлар зиёнли саналади.
Авиакеросин нархи юқори эканига қарамай, Давлатов бу бозорда рақобат йўқ деб бўлмаслигини айтди. Унга кўра, Ўзбекистонда бешта компания авиаёнилғи етказиб беради. Тошкент аэропортига етказиб беришда асосий улушга эга бўлганлар — Uzbekistan Airports ва Uzbekistan Airways. Улар бозорнинг катта қисмини назорат қилмоқда. Saneg компанияси улуши эса 10 фоиздан кам.
Иқтисодчи Отабек Бакировнинг таъкидлашича, ички рейсларнинг рентабел эмаслиги айнан авиаёнилғи қимматлиги билан боғлиқ. Қўмита мазкур ҳолатда ёнилғи нархини тушириш бўйича таклифларини берган, аммо амалдаги нархлар авиакомпанияларга ички рейсларни кенгайтириш имконини бермаяпти.
2025 йил март ойида Uzbekistan Airways раҳбари Шуҳрат Худойқулов Президент томонидан чипта нархини кўтармаслик ва нархлар шаклланишини назорат қилиш юзасидан топшириқ берилганини маълум қилган эди.
Май ойида эса Рақобат қўмитаси Ўзбекистондаги йўловчи авиакомпанияларини сунъий чипта танқислиги яратиш хавфи бўйича расман огоҳлантирган эди.