Фиданнинг сўзларига кўра, учрашув бўйича келишув 23 июл куни Истанбулда ўтган учинчи музокара даврасида муҳокама қилинган. Унинг таъкидлашича, музокарачилар муроса топишга уринаётгани ва ҳозирги динамика сақланса, оралиқ келишувга эришиш мумкинлигини билдирган.
Россия-Украина уруши нафақат минтақавий, балки глобал миқёсда ҳам оғир оқибатларга олиб келаётганини айтган Фидан, буни «инсонпарварлик фожиаси» деб атади. Урушнинг кенгайиши ва халқаро муноқашаларни чуқурлаштириши мумкинлигига алоҳида эътибор қаратди.
Учрашув ҳақида гап кетган музокара 40 дақиқа давом этган ва унда асосий натижаларга эришилмаган. Ягона келишув — асирларни алмашиш жараёнини давом эттириш бўлган. Украина томони Владимир Зеленский ва Владимир Путиннинг август ойигача шахсий учрашувини таклиф қилган, аммо Россия бундай саммитга фақат тинчлик келишуви лойиҳаси тайёрлангандан сўнггина розилик билдирган.
Шу билан бирга, Туркия президенти Ражаб Тоййиб Эрдўған ҳам Истанбулда Путин ва АҚШ президенти Доналд Трамп ўртасидаги учрашувни ташкил қилиш ниятида эканини маълум қилди. У бу орқали Украинадаги урушни тугатишга ҳисса қўшишни мақсад қилганини айтди.