Reuters хабарига кўра, SpaceX муҳандиси Майкл Николлс 100 дан ортиқ терминалнинг иши тўхтаганини тасдиқлаган. Аскарлар дронлар назорати ва шифрланган алоқаларни йўқотган. Бир фронт офицерининг ҳикоя қилишича, қуршаб олиш тўлиқ тўхтаган, қарши ҳужум муваффақиятсизликка учраган.
Маскнинг буйруғи 2022 йил 30 сентябр атрофида амалга оширилган. Унинг ҳаракати Россия президенти Владимир Путиннинг 21 сентябрдаги ядровий таҳдидидан сўнг юзага келган. Маск эскалация хавфидан чўчиб кетган ва бу қарорни АҚШ расмийлари билан муҳокамадан сўнг қабул қилган.
2023 йилда SpaceX президенти Гвинн Шотвелл Украина дрон ҳужумлари учун Starlinkʼдан фойдаланиши тўсиб қўйилганини тан олган. Аммо у тафсилотларни очиқламаган. Маск эса ўз постларида Украина армияси фронти айнан Starlinkʼга боғлиқлигини таъкидлаган. 2025 йил апрелига келиб Украинада 50 мингдан зиёд терминал ишлаётган бўлган, улардан 25 мингини Полша харид қилган.
Starlink Украинада дронлар бошқаруви, шифрланган алоқа ва давлат ахборот тизимлари учун асосий инфратузилма бўлиб хизмат қилган. Тўғридан тўғри хабардор уч манба Маскнинг қарорини тасдиқлаган. Улардан бири: «У уруш натижасини ўз қўлига олди», — дея таъкидлаган.
Бу Маск томонидан жанг майдонида амалга оширилган биринчи технологик тўсиш бўлган. Унинг ўзи Reuters хабарига раддия бериб, «бундай иш қилмаганмиз», — деган. SpaceX эса репортажни «ноаниқ» дея баҳолаган, лекин саволларга жавоб беришдан бош тортган.
2025 йил ҳолатига кўра, SpaceX 7900 та сунъий йўлдошни бошқаради — бу Ер орбитасидаги бутун йўлдошлар сонининг 66 фоизини ташкил этади. Старлинкнинг йиллик даромади 9,8 млрд долларга етган бўлиб, бу SpaceXнинг 60 фоиз даромадини беради.