Исроил армияси якшанба куни Ғазо шаҳри, Деир ал-Балах ва Муваси ҳудудларида ҳар куни соат 10:00 дан 20:00 гача операцияларни тўхтатишини билдирган эди. Бу тадбирлар ёрдам оқимини яхшилаш ва хавфсиз йўлакларни таъминлаш мақсадини кўзлаган. Бироқ душанба кунги зарбалар ушбу вақтинчалик танаффусдан ташқари пайтларда амалга оширилган.
АP ахборот агентлигининг ёзишича, ёрдам ташкилотлари бу чораларни олқишлаган, бироқ улар Ғазодаги очлик муаммосига қарши етарли эмаслигини билдирган. Бу орада, иситиш ва озиқ-овқат етишмаслиги сабабли тунини оч ўтказаётган болалар сурати бутун дунёда ғазаб уйғотди. АҚШ президенти Доналд Трамп бу тасвирларни «даҳшатли» деб атади.
Сўнгги зарбалардан бири Муваси ҳудудидаги уйни нишонга олди. Унда 7 ойлик ҳомиладор аёл ва 11 киши ҳалок бўлди. Палестина Қизил Ярим Ой жамияти маълумотига кўра, аёлнинг фарзанди мураккаб жарроҳлик орқали наҷот топган.
Яна бир зарба Хан-Юнус шаҳридаги икки қаватли уйни нишонга олди. Унда камида 11 киши ҳалок бўлди, уларнинг кўпчилиги аёл ва болалар экани айтилмоқда.
2023 йил 7 октябрда ҲАМАС Исроилга ҳужум уюштириб, 1 200 нафарни ўлдирган ва 251 кишини гаровга олган. Шундан кейин бошланган Исроилнинг жавоб зарбаларида Ғазо соғлиқни сақлаш вазирлиги маълумотига кўра, 59 800 дан ортиқ фаластинлик ҳалок бўлган. Улар орасида аёллар ва болалар сони катта экани таъкидланмоқда.