АҚШ президенти Доналд Трамп Россия–Украина урушига чек қўйиш мақсадида Кремлга қўйган талабини янада кучайтирди. Унинг айтишича, аввал берилган 50 кунлик муддат етарлича бўлмаган ва энди бу муддат 10–12 кунгача қисқартирилади.
«Мен Путинга нисбатан жуда сахийлик қилдим. 50 кун бердим. Энди эса буни 10–12 кунгача қисқартаман»,- деди Трамп журналистлар билан суҳбатда.
Трамп, шунингдек, Путин билан бир неча марта музокаралар ўтказганини, аммо ҳар сафар Украина шаҳарларига ракета ёғдирилгани ва тинч аҳоли ҳалок бўлганини таъкидлади. Унинг фикрича, бу ҳаракатлар музокара жараёнини йўққа чиқаради.
14 июль куни АҚШ президенти Россия ва унинг савдо ҳамкорларига қарши 100 фоизлик бож тўловлари жорий этиш билан таҳдид қилган. Унда Москва 50 кун ичида Украина билан тинчликка эришиш бўйича келишувга бормаса, ушбу чоралар амалга оширилиши айтилганди. Кремл Трампнинг баёнотларини ниҳоятда жиддий деб баҳолаган ва уларни чуқур таҳлил қилиш зарурлигини таъкидлаган. Президент матбуот котиби Дмитрий Песковнинг фикрича, Украина АҚШнинг қарорларини «урушни давом эттириш учун ишора» сифатида қабул қилмоқда.