Huawei ушбу тизимни илк бор апрел ойида эълон қилган эди ва бу хабар сунъий интеллект технологиялари жамоатида катта қизиқиш уйғотди. Мутахассисларнинг фикрича, CloudMatrix 384, Nvidia’нинг GB200 NVL72 деб номланган энг кучли маҳсулотига тўғридан тўғри рақобатчи сифатида кўрилаётир. Huawei тизими 384 та Ascend 910C чипи билан жиҳозланган бўлиб, улар «супер тугун» (supernode) архитектураси орқали ўзаро юқори тезликда боғланган.
Ҳар бир алоҳида чип жиҳатдан Nvidia ҳали устун бўлиши мумкин, аммо умумий тизим самарадорлиги Huawei томонидан яратилган архитектурада юқорироқ натижалар бераётгани таъкидланмоқда. SemiAnalysis компанияси асосчиси Дилан Пателнинг таъкидлашича, Huawei ушбу янги тизими орқали Nvidia’ни маълум жиҳатларда ортда қолдириши мумкин.
Америка экспорт чекловларига қарамай, Huawei сунъий интеллект соҳасида Хитойдаги етакчи маҳаллий чип таъминотчисига айланган. Nvidia бош директори Женсен Ҳуанг ҳам май ойида Bloomberg агентлигига берган интервюсида Huawei’нинг CloudMatrix тизимига алоҳида эътибор қаратган ва компаниянинг тез суръатда ривожланаётганини тан олган эди.
Шу билан бирга, Huawei вакиллари Reuters мухбирларининг тизим бўйича қўшимча саволларига жавоб беришдан бош тортган. Бироқ компаниянинг Huawei Cloud бўлими раҳбари Жан Пинган июнь ойида CloudMatrix 384 тизими аллақачон компаниянинг булут платформасида амалий равишда ишлаётганини маълум қилган.