The Moscow Times нашрининг ёзишича, АҚШ президенти Путиндан Украинадаги урушни тўхтатиш учун аввалида берилган 50 кунлик муддатни 10–12 кунгача қисқартирди. Бу эса геосиёсий хавфни ошириб, янги санкциялар хавфини кучайтирди. Таҳлилчи Дмитрий Бабинга кўра, эҳтимолий санкциялар Россия нефт экспорт тармоғига таъсир қилиши мумкин. Бу эса хорижий валюта тушумини янада чеклайди.
Трампнинг баёнотидан сўнг, юаннинг рублга нисбатан курси 2,55 фоизга кўтарилиб, 11,3450 рублга етди. Форекс бозорида доллар 4 фоизга ошиб, 82,92 рублни, евро эса 1,3 фоизга кўтарилиб, 94,38 рублни ташкил қилди. Россиянинг ташқи бозорида эса доллар 2,4 фоизга қимматлашди ва 81,11 рублга етди.
Трамп 14 июлда Путиндан Украинада ўт очишни тўхтатишни талаб қилган эди. Бироқ сўнгги кунларда Россия янги ҳужумлар бошлаб, Днепропетровск, Суми ва Харкивга зарбалар тайёрлаётгани хабар қилинди. Reuters манбаларига кўра, Путин урушни тўхтатиш ўрнига фронтни кенгайтиришга ҳаракат қилмоқда.
Трамп Буюк Британия Бош вазири Кир Стармер билан учрашувда шундай деди: «Биз бир неча марта келишганмиз деб ўйлагандик. Лекин кейин Путин яна Киевга ракеталар отди. Қариялар уйига тушган зарбада кўп одам ҳалок бўлди. Бу мумкин эмас».
АҚШ раҳбарининг таъкидлашича, агар Кремл 10–12 кун ичида жавоб бермаса, Россия нефтини сотиб олувчи давлатларга 100 фоиз бож жорий этилиши мумкин. Бу чоралар Хитой, Ҳиндистон ва Туркияни қамраб олади. «Мен сахий бўлишни хоҳлардим, лекин ҳеч қандай илгарилаш йўқ», деди Трамп.