Давлат раҳбари қарорига асосан, монополия бир йиллик муддатга — 2026 йил 14 августгача жорий этилди. Бу даврда барча хусусий интернет-провайдерлар ўз халқаро трафик шартномаларини «ЭлКат»га топшириши шарт. Бундан мақсад — рақамли трансформацияни яхшилаш ва халқаро маълумот алмашинуви тизимини марказлаштириш экани айтилади.
Бундан ташқари, ҳукуматга мамлакатдаги йирик интернет оператори — «Акнет» компаниясидаги 100 фоиз улушни ҳам «ЭлКат»га ўтказиш вазифаси юклатилган. Шундай қилиб, бозордаги икки асосий иштирокчи давлат назоратига ўтади.
Монополия билан бир вақтда Жапаров интернетда порнография тарқатилишини чеклаш тўғрисидаги қонунни ҳам имзолади. Унга кўра, ахлоқ ва маънавиятга зид контент тарқалиши аниқлангандан сўнг, провайдерлар ушбу сайтларга икки ойгача блок қўйиши шарт. Қонун расман эълон қилинганидан 10 кун ўтиб кучга киради.
Ушбу ташаббус илк бор 2024 йилда муҳокама қилинганди. Ўшанда «Қирғизтелеком» компаниясига монополия бериш таклифи билдирилган, аммо Алоқа операторлари ассоциацияси (АОС) бунга қарши чиққан. Уларга кўра, бундай чоралар рақобатни чеклайди, муқобил йўлларни йўққа чиқаради ва интернет нархларининг ўсишига олиб келади.
2022 йилга келиб, Қирғизистонда 340 та телекоммуникация компанияси фаолият юритган. АОС билдиришича, либерал сиёсат интернет сифатини оширган ва нархларни барқарор сақлаб турган. Янги қарор эса бутун халқаро трафикни давлат назоратига олиб чиқади ва бунинг оқибатлари олдиндан баҳоланмаган.