Туркиянинг Суперлига жамоаси «Истанбул Башакшеҳир» расман маълум қилишича, жамоа Россия Премер Лигаси вакили ЦСКАдан ўзбекистонлик футболчи Аббосбек Файзуллаевни сотиб олди. Маълумотларга кўра, 21 ёшли ҳужумкор ярим ҳимоячи учун тўланган трансфер суммаси 7,5 миллион еврони ташкил этган.
Шартнома шартларига кўра, Файзуллаев янги клуби билан 2029 йил ёзигача мўлжалланган келишувга эришган ва 11 рақам остида тўп тепади.
«Хуш келибсан, Аббосбек Файзуллаев! Клубимиз сўнгги бор ЦСКА (Москва) жамоасида ўйнаган Ўзбекистон миллий терма жамоаси футболчиси Аббосбек Файзуллаев билан 5 йиллик шартнома имзолади. Файзуллаевга оиламизга хуш келибсан, деймиз ва унга тўқ сариқ-кўк рангли формамиз остида омад тилаймиз», дейилади клуб баёнотида.
Қизиқ томони шундаки, ушбу клубда бошқа ўзбекистонлик ўйинчи Элдор Шомуродов ҳам тўп сурмоқда. Шу тариқа, Туркия чемпионатида икки ўзбекистонлик бир жамоа либосида майдонга тушиш имкониятига эга бўлади.
Файзуллаев ЦСКАда 2 мавсум давомида 72та ўйинда майдонга тушиб, 8та гол урди ва 22та голли пас берди.