Bloomberg маълумотларига кўра, июл ойи якунигача Россиядан денгиз орқали нефт экспорт қилиш ҳажми кунига 3,22 млн баррелни ташкил этди. Бу жорий йилдаги энг паст кўрсаткичлардан бири бўлиб, июн охиридан бери 3 фоизга камайиш кузатилди.
Айниқса, Туркия йўналиши бўйича экспорт кескин қисқариб, сўнгги 3 ойлик минимумга тушди. Бу Россия нефти учун Яқин Шарқ бозоридаги асосий йўқотишлардан бири бўлди. Туркия Кремл учун стратегик бозор бўлиб, у орқали Россия санкцияларга қарамасдан нефтини сотиш имконига эга эди.
Ушбу пасайиш фонида Россия экспортидан тушаётган ҳафталик даромад ҳам сезиларли камайди. 21–27 июл кунлари мамлакат нефт экспортидан 1,14 млрд доллар ишлаб топди — бу аввалги ҳафтага нисбатан 230 млн долларга кам.
Bloomberg таҳлилига кўра, бундай динамика икки омил билан боғлиқ бўлиши мумкин: биринчидан, Urals нефтининг таннархи тушиб, Болтиқ ва Қора денгиз портларидан жўнатилаётган нефть 1 баррел учун 58,60 долларгача арзонлашган; иккинчидан, Россия OPEC+ келишуви доирасида нефть таъминотини қисқартириш мажбуриятини бажараётган бўлиши мумкин.
Агар мослашувчи таъминот сиёсати тўғри бўлса, Россия октябрда кўпроқ нефт қазиб чиқариш ҳуқуқига эга бўлиши мумкин. Бироқ ҳозирча экспорт ҳажми ва нархлардаги тушиш Кремл бюджетига тўғридан тўғри салбий таъсир кўрсатмоқда.