Ҳукуматнинг янги қарори билан шаҳар ва туманларда кўча номлари ҳамда уй рақамларини аниқ кўрсатувчи кўрсаткичлар ўрнатиш тартиби янгидан белгилаб берилди. Қарорда кўрсаткичларнинг материаллари, қопламалари ва ўрнатиш жойига қараб 3 тоифага ажратилиши назарда тутилган.
1-тоифа кўрсаткичлар полиетилентерефталат, поликарбонат ва шунга ўхшаш мустаҳкам материаллардан тайёрланиб, ёритиш мосламалари билан жиҳозланади. Улар шаҳар аҳамиятидаги магистрал кўчаларга ўрнатилади.
2-тоифа кўрсаткичлар эса композит алюминийдан ясалган бўлиб, нур қайтарувчи қопламага эга. Улар туман аҳамиятидаги магистрал кўчалар учун мўлжалланган.
3-тоифа кўрсаткичлар маҳаллий аҳамиятга эга кўчаларга ўрнатилади ва улар ҳам композит алюминийдан тайёрланади.
Низомга кўра, кўрсаткичда кўча номи қисқартирилмаслиги шарт. Бу номларнинг тўлиқ ва аниқ акс эттирилишини таъминлаш ҳамда навигация тизимларининг ишончли фаолиятини кафолатлашга хизмат қилади.
Мазкур тартиб барча ҳудудларда ягона стандартга асосланган ахборот муҳитини яратишни мақсад қилган.