Америкалик сенатор Линдси Грэҳэм ўзининг X (собиқ Twitter) саҳифасида ёзишича, гарчи Россия гарчи санкцияларга чап беришни ўрганган бўлса-да, энди янги иқтисодий зарбаларига тайёр туриши керак.
«Трамп ўйин қоидаларини ўзгартирмоқда. У Россиянинг нефт ва газини сотиб олаётган давлатларга нисбатан ҳам божлар жорий қилишни режалаштирмоқда. Улар шу йўл билан Россиянинг ҳарбий машинасини молиялаштирмоқда», — деб ёзди у.
Грэҳэмнинг фикрича, Москва «санкцияларга ҳурматсизлик» билан ёндашса, яқиндагина унинг маҳсулотларини сотиб олаётган шериклар ҳам шунга мос равишда жавоб қайтаради. Сенатор барча давлатларни Россия билан савдодан келадиган сиёсий ва молиявий оқибатлар ҳақида ўйлашга чақиради.
Бу баёнот Россия президенти матбуот котиби Дмитрий Песковнинг сўзларига жавоб сифатида янгради. Аввалроқ Дмитрий Песков Россия Ғарб босимига «аллақачон мослашгани» ва санкцияларга нисбатан «иммунитет» ҳосил қилганини таъкидлаган эди. Шунингдек, у АҚШ президенти Доналд Трамп томонидан эълон қилинган 10 кунлик ултиматумни ҳам кескин танқид қилган.
Эслатиб ўтамиз, 29 июл куни Трамп Россияни 10 кун ичида Украинадаги урушни тўхтатишга чақирган эди. Акс ҳолда, у нафақат Россияга, балки унга иқтисодий ёрдам кўрсатаётган мамлакатларга нисбатан ҳам 100 фоизлик божлар жорий этилишини таъкидлаган эди. Илк версияда Грэҳэм томонидан тайёрланган санкциялар пакети Россиянинг ҳамкорларига 500 фоизлик тарифларни назарда тутган эди, лекин кейинчалик бу миқдор 100 фоизга туширилди.