АҚШ президенти Доналд Трамп Truth Social платформасида Россия ва Ҳиндистонга қарши танқидий фикрлар билдирди. Унинг таъкидлашича, Қўшма Штатлар ушбу мамлакатлар билан иқтисодий ҳамкорликни жуда кам амалга оширади ва бу борада жиддий ўзгаришлар кутилмаяпти.
«Улар ўлик иқтисодларини бирга ҳалок қилишлари мумкин. Менга аҳамиятсиз. Биз Ҳиндистон билан жуда кам ҳамкорлик қиламиз, уларда бож кўрсаткичлари жуда юқори, дунёдаги энг юқориларидан бири. Худди шундай, Қўшма Штатлар Россия билан ҳам деярли ҳеч қандай ҳамкорлик қилмайди. Келинглар, бу шу йўсинда давом этаверсин», — деб ёзди Трамп.
Энг кескин баёнот эса Россия Хавфсизлик Кенгаши раиси ўринбосари Дмитрий Медведевга қаратилди.
«Ўзини ҳануз Россия президенти деб ҳисоблайдиган омадсиз, собиқ президент Медведевга етказинг, гапларини ўйлаб гапирсин. У жуда хавфли ҳудудга кириб келяпти», — деди АҚШ президенти.
Бу Трампнинг Россия томонидан иккиламчи санкцияларга жавобан АҚШга қарши уруш эълон қилиш билан боғлиқ таҳдидларга берган жавоби бўлди.
Медведев эса Трампнинг постини жавобсиз қолдирмади. У АҚШ раҳбарининг баёнотини асабий деб баҳолади ва Россия ўз йўлида қатъийлик билан давом этишини таъкидлади. Шунингдек, Медведев Трампга «Ўлик қўл» тизими ҳақида эслатди. Бу Совет Иттифоқи даврида ишлаб чиқилган ва ядровий зарбаларга автоматик жавоб беришни кўзда тутувчи тизим ҳисобланади. Тизим шундай мўлжалланганки, агар мамлакат раҳбарияти йўқ қилинса ва буйруқ марказлари билан алоқа узилса, у ядровий зарбани автоматик равишда ишга туширади.