31 июл куни Microsoft’нинг акциялари савдо бошланиши билан 6,25 фоизга ошди ва биржадаги қиймати 560 долларга етди. Бу компания тарихидаги энг юқори нарх ҳисобланади. Акциялар нархи компаниянинг кварталлик ҳисоботи эълон қилинганидан сўнг кескин ошиб кетди. Ҳисоботдаги молиявий натижалар таҳлилчилар кутганидан юқори бўлиб чиқди.
Microsoft ўзининг булутли хизматлари, айниқса Azure платформасидан тушаётган даромадлар кескин ўсганини қайд этди. Шунингдек, компания сунъий интеллект (AI) соҳасига 30 млрд долларлик рекорд инвестиция киритишини маълум қилди. Бу маълумотлар компания акцияларига талабни янада оширди.
Бироқ савдо куни охирига келиб, Microsoft акциялари бироз арзонлашди ва 535 долларга тушди. Бу капитализацияни қисман камайтирди, аммо компания тарихидаги 4 трлн доллар чегараси илк бор забт этилди. Бу кўрсаткич Microsoft’ни дунёдаги иккинчи энг қиммат компанияга айлантирди.
Тарихда илк бўлиб 4 трлн долларлик капитализацияга эришган компания — бу Nvidia. У 9 июл куни ушбу натижани қайд этган. Nvidia сунъий интеллектни ўргатиш учун зарур бўлган график процессорларни ишлаб чиқаради. Microsoft эса ChatGPT’ни ишлаб чиқувчи OpenAI компаниясининг йирик инвестори саналади.
Ҳозирги вақтда Nvidia компаниясининг умумий қиймати 4,39 трлн долларга етди. Учинчи ўринда эса Apple турибди — 3,125 трлн доллар. Amazon ва Google’га эгалик қилувчи Alphabet ҳам кучли бешликдан жой олган. Facebook ва Instagram’ни қамраб олган Meta компаниясининг капитализацияси эса 1,9 трлн долларга тенг.