АҚШ президенти Доналд Трамп Россия томонидан келган таҳдидлар фонида мамлакат мудофаа позицияларини кучайтириш чораларини кўра бошлади. Унинг маълум қилишича, Дмитрий Медведевнинг сўзлари «ниҳоятда провокацион» тусда бўлгани учун АҚШ икки атом сувости кемаcини «тегишли ҳудудлар»га жойлаштирган.
«Сўзлар катта аҳамиятга эга ва кўпинча кутилмаган оқибатларга олиб келади. Умид қиламанки, бу сафар ундай бўлмайди», — деб ёзди Трамп Truth Social платформасидаги саҳифасида.
Ушбу ҳаракатлар Медведевнинг Трамп талаб қилган «10–12 кун ичида тинчлик шартномаси тузиш» чақирувига жавобан Россия томонидаги кескин баёнотлар ортидан юз берди. Медведев Трампни «Россия билан ултиматум ўйнамаслик» ҳақида огоҳлантирган ва буни урушгача олиб борувчи таҳдид деб атаган. Шундан сўнг, Трамп Медведевни «омадсиз собиқ раҳбар» деб атаб, сўзларини ўйлаб гапиришга чақирган. Жавоб тариқасида Медведев «Ўлик қўл» тизими – Россиянинг автоматлаштирилган ядровий тўхтатувчи тизими мавжудлигини эслатган.