АҚШ президенти Доналд Трамп Россия томонидан содир этилаётган таҳдидларга жавобан, Вашингтон ядровий можарога тайёр туришини билдирди. Унинг сўзларига кўра, Россия Хавфсизлик кенгаши раисининг ўринбосари Дмитрий Медведевнинг «Ўлик қўл» тизими ҳақидаги баёнотидан сўнг, АҚШ икки атом сувости кемасини стратегик ҳудудларга жўнатган.
Трамп CNNга берган интервьюсида: «Агар ядровий қурол ҳақида гапираётган бўлсак, биз тайёр бўлишимиз керак ва биз тўлиқ тайёрмиз ҳам», — деди. Унинг таъкидлашича, бу ҳаракат Америка фуқароларининг хавфсизлигини таъминлашга қаратилган.
Бундан аввалроқ Трамп ўзига тегишли Truth Social платформасида бу сувости кемаларининг жўнатилишини «жуда провокацион» баёнотларга жавоб сифатида баҳолаган. У Медведевнинг сўзлари «нафақат муҳим, балки кўп ҳолатларда кутилмаган оқибатларга олиб келиши мумкин»лигини айтган.
Бундан ташқари, Трамп Кремлга 8 августгача Украинадаги урушни тўхтатиш учун муддат белгилаган. Агар бу талаб бажарилмаса, Россия ва унинг савдо ҳамкорларига қарши янги санкциялар ва 100 фоизлик божлар жорий этилишини маълум қилди. У шунингдек, Владимир Путин «санкцияларга моҳирлик билан чап беришни билади», деб ҳисоблашини айтган.
Собиқ денгиз кучлари қўмондони ўринбосари Эрик Рэйвенга кўра, Трампнинг бу қадами ядровий тўқнашувга ҳарбий тайёргарликдан кўра, Москвага жўнатилган сиёсий сигнал сифатида баҳоланмоқда. Унинг таъкидлашича, бу дипломатик эмас, балки «кувалда билан» берилган сигналдир.
Шу билан бирга, Трамп Путин Украинанинг бутун ҳудудини назорат қилишга ҳаракат қилиши мумкинлигини айтди. Унинг таъкидлашича, «бу жуда мураккаб» ва «Путин чақилмас ёнғоқ». Президентнинг таърифлашича, улар аввал яхши музокаралар олиб боришган, аммо кейин бомбалар ёмғирдек ёға бошлаган.