The New York Times манбасига кўра, Ҳиндистон ҳукумати Россиядан нефт сотиб олишни чеклаш ёки тўхтатиш бўйича маҳаллий компанияларга ҳеч қандай кўрсатма бермаган. Мамлакат ҳамон Россия нефтининг энг йирик харидори бўлиб қолмоқда.
Трамп 14 июль куни агар Москва 50 кун ичида Украинадаги урушни тўхтатмаса, Россиядан энергия харид қилаётган мамлакатларга 100 фоизлик бож тўловлари жорий этилишини айтган эди. 29 июл куни эса у бу муддатни 10 кунга қисқартирди. Сабаб сифатида Россия президенти Владимир Путиннинг келишувларга риоя қилмаслиги ва урушни янада авжига чиқараётганини келтирди.
Bloomberg маълумотига кўра, АҚШ босими ортиши фонида Ҳиндистон расмийлари миллий нефт компанияларига муқобил таъминот манбаларини кўриб чиқишни тавсия этган. Бу натижада тўртта йирик НҚИЗ — Indian Oil Corp, Hindustan Petroleum, Bharat Petroleum ва Mangalore Refinery Россия нефтдан вақтинча воз кечган.
Шу билан бирга, Трамп Ҳиндистонга нисбатан импорт божларини 25 фоиз қилиб белгиланишини эълон қилди. Бу музокаралар тўхтаб қолгани ва мамлакатнинг қишлоқ хўжалиги бозорига кириш масалалари ечилмагани билан изоҳланди.
Трамп матбуот анжуманида: «Менга маълум бўлишича, Ҳиндистон энди Россиядан нефт сотиб олмайди. Бу тўғрими-йўқми билмайман, лекин агар шундай бўлса, бу яхши иш», — деган.
Маълумот учун, Россиянинг Украинага босқинидан сўнг Ҳиндистон Россия нефти харидини қарийб нолдан бошлаб, бутун импортининг учдан бир қисмигача етказди. Россия паст нархлар таклиф қилган ва бу мамлакат учун фойдалик шартнома ҳисобланган.