Россия Фанлар академияси ҳузуридаги Геофизика институти маълумотига кўра, 30 июл куни Камчаткада рўй берган кучли зилзиладан сўнг ҳафталик муддатда 7 та вулқон — Безимянный, Камбалний, Каримский, Ключевской, Крашенинников, Мутновский ва Авачинский — фаоллашди. Уларнинг учтасида 300 йилдан ортиқ вақт мобайнида фаоллик кузатилмаган эди.
Институт директори Алексей Озеров бундай ҳодисани «вулқонлар паради» деб атади ва Камчаткада сўнгги бундай ҳолат 1737 йилда зилзила оқибатида кузатилганини таъкидлади. Айниқса, Крашенинников вулқонида илк бор 1463 йилдан бери лава чиқиши кузатилди. Ҳозирда у ерда бир вақтда икки турдаги — чўққи ва ўрта зонадан лава отилиб чиқиши кузатилмоқда.
Камбалний вулқони бир неча ўн йиллик сукутдан сўнг кучли ғулғула чиқармоқда. Унинг 1979 йилда унинг отилиши илмий экспедициядаги бир ходимнинг ҳалок бўлиши билан якунланган эди. Ҳозирда у ерда сейсмик фаоллик кучайиб, 6 км баландликкача кул отилиб чиқиши мумкин.
Ключевскойда лава оқими 3 кмгача етиб, Богданович музлигига яқинлашмоқда. Мутновскийда «сариқ» авиация хавфи коди берилган, сунъий йўлдошлар термал аномалияни қайд этмоқда. Шивелучда экструзив ва эксплозив отилиш, Авачинскийда эса буғ ва газ эмиссияси давом этмоқда. Безымяннийда нисбатан сокин фаоллик қайд этилган.
Камчаткадаги вулқонлар фаоллиги туризмга ҳам таъсир қилмоқда. Гид Алексей Егеелев таъкидлашича, Авачинский ва Мутновскийга саёҳатлар тўхтатилган, хавф юқори бўлгани боис маршрутлар ўзгартирилаяпти. «Қайта зилзила, тош қулаши ва сел хатарлари туфайли сайёҳларни бу ҳудудларга олиб бориш мумкин эмас», деди у.
Зилзила оқибатлари бир неча давлатларда сезилди. Геофизика хизмати маълумотига кўра, афтершоклар — магнитудаси 7,5 га етадиган кучли тўлқинлар — бир неча ҳафта давомида кузатилиши мумкин.