Олий суд матбуот котиби Азиз Абидов маълумотига кўра, 2025 йилнинг январ–июн ойларида Маъмурий жавобгарлик тўғрисидаги кодекснинг 59−2-моддаси («Оиладаги (маиший) зўравонлик») бўйича 4952 киши судланган. Улардан 3200 нафарига жарима, 1752 нафарига эса маъмурий қамоқ жазоси тайинланган.
Шу даврда Жиноят кодексининг 126−1-моддаси билан 231 шахс жиноятда айбдор деб топилган. Улардан 65 нафари озодликдан маҳрум қилинган, қолган 166 нафар шахсга эса озодликдан маҳрум қилиш билан боғлиқ бўлмаган жазо белгиланган.
Маъмурий жавобгарлик тўғрисидаги кодекснинг 41−1-моддаси («Шаҳвоний шилқимлик қилиш») бўйича 986 шахс жавобгарликка тортилган. Улардан 358 нафарга жарима, 628 нафарга эса маъмурий қамоқ жазоси қўлланган.
Бундан ташқари, Жиноят кодексининг 141−3-моддаси («Шахснинг шаъни ва қадр-қимматини камситувчи ҳамда инсон ҳаётининг сир сақланадиган томонларини акс эттирувчи маълумотларни ошкор қилиш») бўйича 99 нафар шахс судланган. Улардан 24 нафарга озодликдан маҳрум қилиш, 75 нафарга эса енгилроқ жазо белгиланган.
2023 йил апрелида қабул қилинган қонунга кўра, ушбу моддалар Маъмурий ва Жиноят кодексларига киритилган. Қонун кучга кирганидан бери ўтган 9 ойда 9100 дан ортиқ шахс оиладаги зўравонлик учун жавобгарликка тортилган, 2024 йилда эса бу кўрсаткич 15 мингдан ошган.
Аввалроқ, хотин-қизларга нисбатан зўравонлик ҳолатларида 9 мингдан ортиқ шахс жазога тортилганлиги ҳафида хабар берган эдик.