АҚШ президенти Доналд Трамп сўнгги баёнотида Россияга урушни тўхтатишга оид «ҳақиқий натижалар» кўрсатиши учун фақат «бир неча кун» муҳлат берилишини билдирди. Акс ҳолда, Москвага нисбатан янги санкциялар ва эҳтимолий божлар жорий этилиши мумкинлигини айтди.
«Foreign Policy» таҳлилчиси Николас Фентон ёзган мақолага кўра, бу санкциялар қанчалик самарали бўлиши номаълум. Россия жанговар қобилиятини анча юқори даражада сақлаб турибди ва тахминларга кўра, урушни яна камида уч йил давом эттиришга қодир. Нашр мақоласида қайд этилишича, Россиядаги иқтисодий фаоллик сақланмоқда ва мамлакат иқтисодиёти тўлиқ ҳарбий релсларга ўтказилган.
Фентонга кўра, санкциялар мутлақо самарасиз деб бўлмайди, аммо уларни самарали қилиш учун стратегик ёндашув талаб этилади. Россия жамиятидаги мафкуравий сафарбарлик ва аҳолининг ишончи — мамлакат иқтисодий барқарорлигининг асосий омили ҳисобланади.
Шу билан бирга, таҳлилда Россия иқтисодиётида «қизиб кетиш» белгилари кузатилаётгани қайд этилган. Бундан хавотирланган Марказий банк фоиз ставкаларини пасайтиришга киришган. Экспертларнинг фикрича, бу ҳолат ортиқча юкланишнинг дастлабки белгиларидан дарак бериши мумкин.
Муаллифнинг таъкидлашича, Россия ҳукуматининг ўзига хос заиф нуқтаси — «кўзга кўринадиган ғалаба»га бўлган эҳтиёждир. Агар бундай натижа бўлмаса, жамиятни бирлаштириб турган идеологик конструкция парчаланиши мумкин.
Фентон хулосасига кўра, Россиядаги мустаҳкамликни фақат янги санкциялар эмас, балки уларнинг аниқ ва мақсадли қўлланилиши синаб кўриши мумкин. Фақат шундагина улар вазиятни ўзгартиришда ҳал қилувчи аҳамиятга эга бўлади.