Биргина Microsoft компанияси ўтган чоракда сунъий интеллектни ривожлантириш учун 24,2 млрд доллар сармоя киритди ва ҳозирги даврда бу миқдорни 30 млрд долларга етказишни режалаштирмоқда. Amazon эса 31,4 млрд доллар сармоя киритган бўлиб, бу ўтган йилга нисбатан деярли икки баробар кўп. Google’нинг бош компанияси Alphabet 85 млрд долларлик капитал харажатларни прогноз қилмоқда. Meta Platforms эса ўз харажатлар прогнозини ошириб, 2025 йилда янада катта инвестицияларни кутмоқда, деб ёзмоқда Bloomberg нашри.
Тўртала гигант компания жами 344 млрд доллардан ортиқ сармоя киритишни режалаштирган бўлиб, бу маблағлар асосан сунъий интеллект ва булут технологиялари учун зарур бўлган маълумот марказларига сарфланади. Bloomberg Intelligence таҳлилчиси Mandeep Singh’нинг таъкидлашича, компаниялар сунъий интеллектга сармоя киритиш орқали булут инфратузилмасидаги харажатларини уч бароварга оширишди.
Meta ўзининг иккинчи чорак савдо натижаларини эълон қилиб, сунъий интеллект соҳасига қилинган сармоянинг самараларини кўрганини маълум қилди. Meta бош ижрочи директори Марк Цукерберг бу ҳақда: «Реклама соҳасидаги кучли натижалар асосан СИ тизимимизни янада самарали қилишга ёрдам берди», — дея таъкидлади. Шунингдек, Meta жамоаси янги улкан маълумот марказларини қуриш ва энг яхши СИ тадқиқотчиларини жалб қилишни режалаштирмоқда.
Alphabet компанияси эса капитал харажатлар прогнозини 10 млрд долларга оширди ва 2026 йилда яна кўпроқ сармоя киритишни кутмоқда. Google бош директори Сундар Пинчай бу сармояларни мижозлар талабига мос келиши учун зарур деб ҳисоблайди.
Агар Google рақибларидан орқада қолмасликни хоҳласа, унда ўзининг инфратузилмасига ва дастурларига сармоя киритишдан бошқа танлов йўқ, деб изоҳлади бу ҳолатни Forrester таҳлилчиси Никҳил Лаи.
Microsoft’га келсак, унинг натижалари «яхши» деб баҳоланмоқда. Компания сунъий интеллект инфратузилмаси бўйича етакчилик қилаётганини маълум қилган.
Appleнинг капитал режаларининг йирик технология рақиблари билан солиштирганда кичикроқ бўлса ҳам, компания ўз сармояларини оширди. Apple’нинг мулк ва жиҳозлар бўйича сармояси 9,47 млрд долларни ташкил этди, бу ўтган йилга нисбатан 45 фоизга ошган.
Аввалроқ Chat GPT сунъий интеллектли чат-боти эгаси OpenAI Ўзбекистонга 2025 йилнинг биринчи ярмида 2,9 млрд солиқ тўлагани хабар қилинган эди.