TechCrunch маълумотларига кўра, Ўзбекистондаги етакчи рақамли экотизим Uzum Хитойнинг йирик IT гиганти Tencent ҳамда халқаро инвестиция фонди VR Capitalдан қарийб 70 млн доллар инвестиция жалб қилди. Мазкур келишувда 2024 йил март ойидаги биринчи раунднинг етакчи инвестори бўлган FinSight Ventures ҳам иштирок этди.
Ушбу сармоя натижасида Uzumнинг бозордаги баҳоси тахминан 1,5 млрд долларга етди. Бу Хитойнинг Tencent компанияси томонидан Ўзбекистондаги илк технологик инвестиция бўлиб, мамлакат рақамли иқтисодиётига бўлган ишончнинг ёрқин ифодасидир.
Uzum хизматларидан ҳар ойда қарийб 17 млн фойдаланувчи бенефит оляпти. Uzum Bank карталаридан фойдаланувчилар сони 2 млн нафардан ошиб кетган. Компания 3 йилдан кам вақт ичида мамлакатнинг йирик солиқ тўловчиларидан бирига айланди, бутун Ўзбекистон бўйлаб 12 мингдан ортиқ иш ўрни яратди ва 40 мингдан зиёд тадбиркорни бизнесини ривожлантиришда қўллаб-қувватлади.
Жалб қилинган маблағлар Uzumнинг ўз финтех инфратузилмасини ривожлантиришга, маҳсулотлар турини кенгайтиришга, рақамли савдо ечимларини такомиллаштиришга ҳамда онлайн савдо ва финтех бозоридаги етакчилик позициясини мустаҳкамлашга йўналтирилади.
Маълумот учун,Tencent — Шэньчжэн шаҳрида жойлашган, дунёдаги энг йирик технология ва инвестиция конгломератларидан бири бўлиб, 800 дан ортиқ компанияда улушга эга. VR Capital эса Нью-Йорк ва Лондонда жойлашган, 8 млрд доллардан ортиқ активларга эга халқаро инвестиция фондидир. FinSight Ventures эса финтех ва электрон тижорат соҳаларида йирик тажрибага эга венчур фонди ҳисобланади.