Харидор 10 йил давомида фаолият йўналишини сақлаб қолиш ва General Motors билан амалдаги ҳамкорлик шартларига риоя этиш мажбуриятини олди.
Давлат активларини бошқариш агентлиги маълумотига кўра, аукцион натижасида «Best Pipe and Parts» 100 фоиз давлат улуши учун 230 млрд сўм (Марказий банк курси бўйича тахминан 18,2 млн доллар) таклиф қилди. Битим Давлат комиссияси томонидан маъқулланган. Харидор бир ой ичида тўловнинг камида 35 фоизини амалга ошириши шарт. Таклиф баҳоланган қийматдан юқори бўлгани қайд этилди.
Аукцион 2024 йил августда эълон қилинган бўлиб, дастлаб тўртта инвестор қизиқиш билдирган, учтаси мажбурий таклифни йўллаган.
Шартнома талабларига кўра, харидор камида 10 йил Avto Climate Control’нинг асосий ишлаб чиқариш йўналишини ўзгаришсиз сақлаши лозим. Шунингдек, GM технологияларидан фойдаланиш, техник қўллаб-қувватлаш бўйича лицензия келишувларига ва «Бош альянс» шартларига риоя этиши зарур.
Best Pipe and Parts (собиқ Uz-Dongwon Co) 1996 йилдан автомобил бутловчи қисмлар ва аксессуарлар ишлаб чиқариш билан шуғулланиб келади. Устав капитали 297 млн сўм. Асосий акциядорлар — UzAuto Korea (42,3 фоиз), UzAutoComponents (24,44 фоиз), Dongwon Metal (24 фоиз) ва Салима Тошқўзиева (9,26 фоиз). 2025 йил февралда компания «Автокомпонент»нинг 98,8 фоизини ҳам сотиб олган.
Avto Climate Control 2010 йилда «Ўзавтосаноат» ва Janubiy Koreyaning ERAE CS Ltd. ҳамкорлигида ташкил этилган бўлиб, UzAuto Motors ишлаб чиқарадиган Chevrolet автомобиллари учун радиатор, вентилятор ва кондиционерлар ишлаб чиқаради.