5 август куни CNBC телеканалига берган интервьюсида АҚШ президенти Доналд Трамп Россия президенти Владимир Путиннинг Украинадаги урушига нуқта қўйиши эҳтимоли ҳақида гапирди. Унинг сўзларига кўра, агар Brent нефти нархи яна 10 га ташласа, Россия урушни тўхтатишга мажбур бўлади, чунки «Путинда бошқа йўл қолмайди», деб унинг сўзларини келтирмоқда DW.
Трамп Путиннинг иқтисодий аҳволи оғир эканини таъкидлади ва унинг «ўлдиришни тўхтатиши» кераклигини билдирди. Шунингдек, у Ҳиндистонга нисбатан олиб борилаётган сўнгги бож сиёсатини ҳам шарҳлади. Унга кўра, Ҳиндистон Россия нефтини сотиб олиш орқали «Россиянинг ҳарбий машинаси»ни қувватламоқда. Трамп бу давлатга нисбатан жорий 25 фоизлик божни келаси 24 соатда ошириш ниятида эканини билдирди.
Ҳафта бошидан буён Brent нефти нархи 71–72 доллардан 68 долларгача пасайди. Бу жараёнга OPEC+нинг сентябрдан бошлаб нефт ишлаб чиқариш ҳажмини ошириш қарори, Бразилияда катта нефт конларининг очилиши ва Ҳиндистон ҳамда Хитойнинг Россия нефтини харид қилишни давом эттириши ҳақидаги хабарлар таъсир қилди.
Шу билан бирга, Россияда АИ-95 маркали бензин нархи иккинчи кун кетма-кет рекорд даражага етди. 5 августда тоннасининг нархи 77 967 рублга чиқди. Бунга, эҳтимол, 2 август куни Украина дронлари томонидан Новокуйбишевск ва Рязандаги нефтни қайта ишлаш заводларига уюштирилган зарбалар сабаб бўлган.
14 июл куни Трамп Россияга 50 кунлик муҳлат бериб, агар уруш тўхтатилмаса, 100 фоизли иккинчи даражали санкциялар жорий этилишини айтган эди. 28 июл куни у бу муҳлатни 10–12 кунга қисқартирди. Унинг махсус вакили Стивен Уиткофф 6 ёки 7 август куни Москвани яна бир бор ташриф билан боради.
Кремл расмийлари Трампнинг таҳдидларига жавобан Россия иқтисодиёти санкцияларга «иммунитет» ҳосил қилганини маълум қилди. Путин эса, Reuters манбаларига кўра, Трампнинг ултиматумига жавоб қайтаришни истамайди, чунки у урушда ғалаба қозонишига ишонмоқда.