6 август куни эълон қилинган расмий маълумотга кўра, «Академик С.Й.Юнусов» номидаги Ўсимлик моддалари кимёси институти олимлари томонидан яратилган «Паркинсон касаллигини даволаш учун восита» номли янги препарат давлат рўйхатига олинди.
Маълум қилинишича, ушбу восита таркибида тиканакли кавар (Capparis spinosa L.) ўсимлигининг куртаклари ва пишмаган меваларидан олинган экстракт мавжуд. Ундан тайёрланган восита асосан табиий биологик моддалар — полисахаридлар (30–35%), флавоноидлар (5–10%) ва сувда эрувчан оқсиллар (20–25%)дан иборат.
Таъкидланишича, восита Паркинсон касаллигининг олдини олиш ва даволашда қўлланилади ҳамда кам ножўя таъсирга эга.
«Паркинсон касаллиги марказий асаб тизимининг сурункали хасталиги бўлиб, титроқ, қотиб қолиш, ҳаракат чекланиши каби белгилар билан кечади. Ҳар қандай янги, саноатда қўлланилиши мумкин бўлган техник ечим ихтиро сифатида ҳуқуқий муҳофазага эга бўлади», дейилади Адлия вазирлиги хабарида.