Reuters агентлигининг Кремлга яқин манбаларига таяниб хабар беришича, Россия генераллари президент Владимир Путинга Украина фронтидаги мудофаа тизими 2–3 ой ичида қулашига ишонтирган. Путин эса бу фурсатдан фойдаланиб, Украина шарқидаги тўрт областни тўлиқ эгаллаш ниятида экани айтилмоқда.
Украинанинг DeepState лойиҳаси маълумотларига кўра, Россия армияси июл ойида 564 км², июн ойида эса шунга яқин ҳудудларни босиб олган. Бу сўнгги ўн ой ичидаги энг юқори кўрсаткич ҳисобланади.
Айни пайтда Россия армияси Донецкдаги Часив Яр шаҳрининг катта қисмини эгаллаганини эълон қилди. Украина қуролли кучлари буни рад этган бўлса-да, мустақил кузатувчилар Россиянинг шарқ ва шимолдан илгарилаб кирганини тасдиқлашмоқда. Ғарб ва жанубий ғарб томонлар эса ҳали ҳам украиналиклар қўлида.
Шунингдек, Россия кучлари Суми областига киргани, Днепропетровск томон юриш бошлагани, Херсонга авиабомбалар йўллаётгани ва Покровск атрофида 110 минг кишилик гуруҳ тўплагани қайд этилган. Британия разведкаси маълумотларига кўра, Покровск учун кечаётган жангларда Россия кунига 1000 нафардан ортиқ жангчи йўқотмоқда.
Бундан ташқари, Россия ҳукумати ҳарбий контракт тузувчиларга ўртача 1,8 млн рубл (22 минг доллар) миқдорида бонуслар таклиф қилмоқда. 2025 йилнинг биринчи ярмида 200 мингдан ортиқ янги жангчи армияга жалб қилинган. НАТО ва АҚШ разведкаси бу рақамларни тасдиқламоқда — ойига 30–40 минг киши фронтга кетмоқда.
ISW таҳлилчиси Жорж Барросга кўра, агар шу суръат сақланса, Путин Украинага қарши урушни яна 12–16 ой давом эттириши мумкин. Бироқ бу муддат ичида Россия бюджети ва жангчи ресурслари тугаш хавфи бор.