BBC хабар қилишича, сармоя Apple’нинг аввал эълон қилган 500 млрд долларлик тўрт йиллик инвестиция режасига қўшимча бўлади. Оқ уйга кўра, янги маблағлар Apple маҳсулотлари учун эҳтиёт қисмларни АҚШда ишлаб чиқаришга, етказиб берувчилар билан ҳамкорликни кучайтиришга ва янги маълумот марказлари қурилишига йўналтирилади.
6 август куни Трамп ва Apple раҳбари Тим Кук Оқ уйдаги расмий маросимда биргаликда чиқиш қилди. Трамп сармоя туфайли Apple 100 фоизлик бож солиқларидан қутулганини маълум қилди. Шунингдек, бошқа компаниялар ҳам шундай инвестиция йўналишини танласа, солиқ имтиёзларига эга бўлиши мумкинлигини билдирди.
Apple янги сармоя доирасида Кентуккида iPhone ва ақлли соатлар учун «ақлли ойна» ишлаб чиқаришни бошлайди. Тим Кукнинг таъкидлашича, ушбу лойиҳа компаниянинг АҚШда компонентлар ишлаб чиқариш салоҳиятини кучайтиради. Шунингдек, у Трампга ўз қўли билан ясаган шиша ҳайкалча совға қилган.
Apple компанияси айни вақтда Хитойга боғлиқ етказиб бериш занжирини диверсификация қилмоқда — айрим ишлаб чиқаришларни Ҳиндистон ва Вьетнамга кўчирмоқда. Шунга қарамай, компания 2025 йилнинг иккинчи чорагида АҚШга тарифлар сабабли 800 млн доллардан ортиқ бож тўлаган.