Оnet нашрига кўра, АҚШ президенти Доналд Трампнинг махсус вакили Стив Уиткоффнинг Москвага сафари чоғида Россия президенти Владимир Путинга Украинада ўт очишни тўхтатиш эвазига бир нечта сиёсий ва иқтисодий имтиёзларни ўз ичига олган таклиф берилган.
Тахминий келишувга кўра, агар Москва музокараларга розилик билдирса, у «жуда кўп ютуқларни» қўлга киритиши мумкин. Таклифдаги энг асосий бандлардан бири — Россия томонидан босиб олинган Украина ҳудудларини АҚШ томонидан расман тан олиш муддатини 49 ёки 99 йилга кечиктиришдир. Бу эса маълум муддатга ушбу ҳудудлар устидан Москва назорати тан олинишини англатади.
Бундан ташқари, Вашингтон Москвага қарши жорий қилинган санкцияларнинг катта қисмини бекор қилиш, шунингдек, энергетика соҳасида, хусусан, Россиядан нефт ва газ етказиб беришни қайта тиклаш имкониятини кўриб чиқишни таклиф қилган.
Шу билан бирга, таклифда барқарор тинчлик ҳақида эмас, фақат ўт очишни тўхтатиш масаласи тилга олинган. НАТОни кенгайтирмаслик ёки Украинага ҳарбий ёрдамни тўхтатиш каби Москванинг талаблари эса ҳужжатда келтирилмаган.