АҚШ президенти Доналд Трамп, агар ЕИ АҚШга инвестиция киритиш бўйича келишувни бажармаса, Европа Иттифоқи товарларига 35 фоизлик импорт тарифлари жорий этилиши мумкинлигини билдирди. Бу ҳақда у CNBC телеканалига берган интервюсида айтиб ўтди.
Унинг сўзларига кўра, ЕИ томони 600 млрд долларлик сармоя мажбуриятини олган, шу муносабат билан АҚШ аввал уларга нисбатан тарифларни 30 фоиздан 15 фоизга туширган. Трамп буни «ЕИ томонидан берилган совға» деб атади ва унинг таъкидлашича, бу маблағни АҚШ ўз хоҳишига кўра ишлатиши мумкин.
Шу билан бирга, Трамп баъзи давлатлар АҚШдан нега ЕИга бошқалардан кам бож тўланиши ҳақида норозилик билдирганини айтиб, буни улар томонидан берилган сармоя миқдори билан изоҳлади.
DPA агентлигининг таъкидлашича, Трампнинг бу баёнотлари Брюсселнинг келишув бўйича расмий талқинига зид келади. Европалик манбаларга кўра, ЕИ компаниялари 2029 йилгача АҚШ иқтисодиётига камида 600 млрд доллар сармоя киритишдан манфаатдор, аммо бу аниқ мажбурият эмас.
Шунингдек, Европа Комиссияси маълумотларига кўра, ЕИ келгуси йилларда АҚШдан 750 млрд долларлик энергия ресурслари харид қилиш ниятида. Шу боис, Трампнинг баёнотлари икки томонлама келишувнинг мазмунига нисбатан турлича ёндашув мавжудлигини кўрсатади.