Трамп Европа етакчилари билан телефон орқали суҳбат чоғида ўзининг бу ниятларини ошкор қилган. NYT манбаларининг таъкидлашича, Трамп европалик етакчиларни музокараларга чақирмоқчи эмас.
Бунгача АҚШ президенти Доналд Трамп 2025 йил 6 август куни ўзининг махсус вакили Стив Уиткоффнинг Россия президенти Владимир Путин билан бўлиб ўтган учрашувини «катта ютуқ» деб баҳолади. Унинг айтишича, Стив Уиткофф Москвадаги музокараларда муваффақиятга эришган. Бу ҳақда Трамп Truth Social тармоғидаги саҳифасида ёзиб қолдирган.
Трампнинг сўзларига кўра, Уиткоффнинг Путин билан учрашуви 2022 йил феврал ойида Россиянинг Украинага кенг кўламли босқини ортидан бошланган 3,5 йиллик урушни тугатишга бағишланган. Трамп Европа Иттифоқи давлатларига ҳам учрашув мазмуни бўйича маълумот берганини айтди.
Шу билан бирга, Оқ уйдан маълум қилишларича, Вашингтон жума куни иккинчи даражали санкциялар жорий этишга тайёргарлик кўрмоқда. Бу санкциялар Россия билан иқтисодий алоқаларни давом эттираётган давлат ва компанияларга қаратилган бўлиши мумкин.
Эслатиб ўтамиз, Стив Уиткоффнинг Москвага бу сафари жорий йилдаги бешинчи ташрифи бўлди. У ва Путин аввалроқ 11 феврал, 13 март, 11 апрел ва 25 апрел кунлари ҳам учрашишган. Ушбу музокаралар натижалари Трампнинг сиёсий дастури доирасидаги тинчлик ташаббуслари билан боғлиқ ҳолда баҳоланмоқда.
АҚШ Россияга бевосита ёрдам кўрсатаётган давлатлар ёки ташкилотлар учун иқтисодий чораларни кучайтириш ниятида. Иккинчи даражали санкциялар эса шу йўналишдаги энг қаттиқ босим механизмларидан бири сифатида кўрилмоқда.
Украина президенти Володимир Зеленский Доналод Трамп ва европалик ҳамкорлар билан қўнғироқлашгач, ўзинининг анъанавий тунги видеомурожаатида «афтидан, Россия ўт очишни тўхтатишга кўпроқ қизиқиш билдираяпти», деди.
«Биз Россияда айтилган гапларни муҳокама қилдик. Афтидан, Россия энди ўт очишни тўхтатишга кўпроқ қизиқиш билдираяпти. Уларга қилинаётган босим иш бермоқда. Энди муҳими улар бизни ва АҚШни деталларда алдаб кетмаслиги керак», — деган Зеленский.
Аввалроқ кеча Москвада ўтган музокара чоғида Путин АҚШга маълум «сигналлар» бергани, бундай сигналлар АҚШ президенти Доналд Трампдан ҳам олингани ҳақида хабар қилган эдик.