6 август куни Москвага ташриф буюрган АҚШ президентининг махсус вакили Стивен Уиткофф Владимир Путин билан учрашувда Россия раҳбарининг Украинага қўйган шартларини нотўғри англаган бўлиши мумкин. Bild нашри немис ва украин расмийларига таяниб, Путин Запорижжя ва Херсондан украин қўшинларининг «тинч йўл билан чиқишини» талаб қилган, аммо Уиткофф буни Россия қўшинларининг чиқиши деб тушунгани айтилмоқда.
Манбаларга кўра, аслида Путин Донецк, Луҳанск, Запорижжя ва Херсон областларини тўлиқ назорат қилиш ниятидан қайтмаган. Украина ҳукуматидан бир манба «Уиткофф нимани гапираётганини ўзи ҳам билмайди», деган. Шундай фикрни Германия ҳукумат вакиллари ҳам қўллаб-қувватлаган.
Bild маълумотига кўра, Путин фақат энергетика объектлари ва фронт ортидаги йирик шаҳарларга ҳужумни тўхтатишни таклиф қилган, аммо тўлиқ оташкесимга рози эмас. АҚШ эса фронтни жорий ҳолатда музлатиш, санкцияларни кенгайтириб олиб ташлаш ва янги иқтисодий келишувлар эвазига битим таклиф қилган, лекин Кремл бу вариантни қабул қилмаган.
Путин—Уиткофф музокараларидан сўнг АҚШ расмийлари европаликлар билан видеомулоқот ўтказди. Bildʼнинг ёзишича, европаликларда америкаликларнинг вазиятни тўлиқ англамаётгани ҳақида таассурот қолган. Уиткофф ҳудудий масалаларни изоҳлар экан, нутқи чалкаш ва малакасиз йироқ туюлган.
Бундан олдин Bloomberg ва The Wall Street Journal манбалари Кремл Донбассдан украин қўшинларини олиб чиқиш ва Қрим устидан Россия назоратини тан олиш шарти билан Херсон ва Запорижжяда ҳужумни тўхтатишга тайёр эканини ёзганди. Бундай «ҳудудий алмашинув» оташкесим ва кейинги техник музокараларга йўл очиши мумкинлиги қайд этилган.