Украина президенти Володимир Зеленский Конституцияда ҳудудий масала бўйича аниқ жавоб мавжудлигини таъкидлаб, мамлакат ўз ерларини Россияга бермаслигини билдирди. Унинг сўзлари АҚШ президенти Доналд Трампнинг «тинчлик шартномаси доирасида икки томон манфаати учун ҳудудлар алмашинуви керак», деган баёнотидан сўнг айтилгани эҳтимол қилинмоқда.
«Бу масаладан ҳеч ким чекинмайди ва чекина олмайди. Украинлар ўз ерларини босқинчига совға қилмайди», — деди Зеленский Telegram орқали йўллаган мурожаатида. У, шунингдек, Украина Россияга ҳамон давом этаётган кенг кўламли уруш учун мукофот бермаслигини қўшимча қилди.
Зеленскийнинг айтишича, Киев ҳақиқий тинчликка олиб келадиган қарорларга тайёр, аммо Украина иштирокисиз қабул қилинган келишувлар тинчлик эмас, балки «ўлик қарорлар»дир. «Бундай битимлар ҳеч қачон иш бермайди. Бизга барча ҳурмат қиладиган, ҳақиқий ва узоқ муддатли тинчлик керак», — деди у.
Украина раҳбари мамлакат Трамп ва барча ҳамкорлар билан биргаликда, Москва хоҳиши туфайли емирилмайдиган тинчлик учун ишлашга тайёрлигини таъкидлади. Унинг фикрича, фақат шундай йўл билангина урушни адолатли тугатиш мумкин.