Смартфонлар бўйича ихтисослашган Phone Arena портали 2025 йилда сотиб олишга арзийдиган энг яхши компакт моделлар рейтингини эълон қилди. Уларда фақат ўлчамлар эмас, балки ишлаш тезлиги, функционал имкониятлар, қурилиш сифати ва бошқа муҳим жиҳатлар ҳисобга олинган.
iPhone Mini ва Asus Zenfone линейкалари йўқолганидан сўнг, ҳозир 6–6,3 дюймли экранли қурилмалар компакт ҳисобланади. Охирги пайтларда бундай смартфонларга талаб ортиб бормоқда.
Биринчи ўринга 6,1 дюймли OLED-дисплейга эга iPhone 16 қўйилди. У iPhone 13 Mini’нинг замонавий ўрнини босувчи деб баҳоланмоқда — тезкор, қулай автономликка эга ва замонавий дизайнда. Айтишларича, бу йил базавий моделнинг ўлчами каттароқ бўлиши мумкин.
Android тарафдорлари учун энг яхши муқобил — Samsung S25. Унинг 6,2 дюймли экрани ва 162 грамм вазни билан у енгил ва қулай. Смартфон сўнгги Snapdragon 8 Elite чипи, юқори сифатли камералар ва 7 йиллик дастурий таъминот янгиланишини таклиф қилади.
Учинчи ўринни 6,3 дюймли Google Pixel 9 Pro эгаллади. У суратга олишни яхши кўрадиганлар учун энг яхши компакт смартфон сифатида эътироф этилди.
Энг арзон вариант сифатида Google Pixel 9a танилди — 499 доллар эвазига Tensor G4 процессори, икки камерали тизим, Google AI имкониятлари ва 7 йиллик Android янгиланишлари таклиф этилади. iPhone 16e ҳам арзонроқ муқобил сифатида кўрсатилди.
Шунингдек, Motorola Razr Ultra ва Motorola Razr (2025) «раскладушка» моделлари ҳам рейтингга киритилди. Асосий 7 дюймли экранга эга бўлса-да, уларнинг букланадиган механизми туфайли жуда компакт ҳисобланади.