Reuters нашрининг хабар беришича, 9 август куни кечаси Тел-Авивда Исроил Бош вазири Биньямин Нетаньяҳунинг деярли икки йилдан бери давом этаётган Ғазо урушида ҳарбий ҳаракатларни кучайтириш режасига қарши йирик намойиш ўтказилди. Намойишчилар урушни тўхтатиш ва ҳалигача Ғазода гаровда сақланаётган 50 нафардан ортиқ инсонни озод қилишни талаб қилмоқда.
Бу қарор арафасида хавфсизлик кабинети Ғазо шаҳрини эгаллаш ва ҳарбий амалиётларни кенгайтиришга оид қарор қабул қилгани маълум қилинди. Ҳарбий раҳбарият бундай қадам гаровдагилар ҳаётини хавф остига қўйиши мумкинлигидан огоҳлантирган. Сўровлар аҳолининг катта қисми ҳарбий ҳаракатларни дарҳол тўхтатиш тарафдори эканини кўрсатмоқда.
Намойишда гаровдагиларнинг яқинлари, жумладан, Лишай Миран Лави ҳам нутқ сўзлаб, АҚШ Президенти Доналд Трампга мурожаат қилди ва урушни тугатишга ёрдам беришини сўради. Кўпчилик озод этилган гаровдагилар музокаралар орқали қайтарилган. Аммо июлдаги оташкесим музокаралари натижасиз якунланди.
Тел-Авивдаги митингда қатнашганлар Исроил байроқлари ва гаровдагилар суратлари акс этган плакатларни кўтарди. Бир гуруҳ иштирокчилар эса Ғазода ҳалок бўлган болалар тасвирларини намойиш қилди. Митинг қатнашчилари Нетаняҳу режасига қарши ва Трампдан аралашув талаб қилувчи шиорлар ёзилган плакатлар ҳам кўтаришган.