Сицилиянинг Мессина шаҳрида минглаб одамлар Италия ҳукуматининг материкни орол билан боғлайдиган кўприк қуриш режасига қарши намойиш ўтказди. Associated Press агентлигининг ёзишича, 13,5 млрд евро қийматдаги йирик инфратузилма лойиҳаси сейсмик хавф, атроф-муҳитга таъсир ва мафия аралашуви эҳтимоли туфайли кескин танқид қилинмоқда.
Мессина бўйлаб ўтган маршда иштирокчилар «No Ponte» («Кўприк керак эмас») шиорлари остида чиқиш қилди. Ташкилотчиларга кўра, намойишда 10 минг киши қатнашган. Қаршиликнинг яна бир сабаби — қурилиш учун 500 га яқин оила мулки экспроприация қилиниши режалаштирилгани.
Лойиҳа бўйича кўприк деярли 3,7 км узунликда бўлиб, 3,3 кмлик осма қисми билан дунёдаги энг узун осма кўприкка айланади. У Туркиядаги Чаноққалъа кўприги рекордини 1277 метрга янгилайди.
Италия транспорт вазири Маттео Салвини лойиҳанинг асосий сиёсий тарафдори бўлиб, уни «Ғарбдаги энг йирик инфратузилма қурилиши» деб атади. Унинг айтишича, қурилиш йилига 120 минг иш ўрни яратиши ва Жанубий Италияда иқтисодий ўсишни рағбатлантириши мумкин. Шунингдек, кўприк НАТО талаб қилаётган мудофаа харажатлари доирасида стратегик объект сифатида белгиланиб, ҳарбий кучлар ва техника тезкор ҳаракатланиши учун йўлак вазифасини ўтайди.
Экологик ташкилотлар ЕИга шикоят киритиб, лойиҳа қушлар миграциясига салбий таъсир кўрсатишини билдирди. Италия президенти қурилиш мафиядан ҳоли бўлиши учун унга антимафия қонунчилиги талаблари қўлланилишини таъкидлади.
Қурилишга тайёргарлик ишлари сентябр охири — октябрь бошларида, Италия ҳисоб палатасидан рухсат олингач бошланиши мумкин. Асосий ишлар 2026 йилда старт олиб, 2032–2033 йилларда якунланиши режалаштирилган.