Қашқадарё вилояти ИИБ маълумотича, ҳодиса 24 июл куни соат 22:30 ларда Чироқчи туманида содир бўлган. Д.И. исмли аёл 102 рақамига қўнғироқ қилиб, расмий никоҳсиз яшаб келаётган эркак Н.П.нинг онаси уйига келиб, жанжал чиқарганлиги ҳақида хабар қилган.
Профилактика инспектори воқеа жойига етиб келиб, можарони тўхтатиш мақсадида эркакни туман ИИБ биносига олиб кетган. Шу пайтда унинг расмий никоҳдаги аёли ва қариндошлари «Сенга эрим керакми?» деб, Д.И.ни бир неча марта тепиб ва уриб, кийимисиз ҳолатда қолдирган.
Мазкур ҳолат акс этган видео жамоатчиликнинг қаттиқ эътирозига сабаб бўлди. Инспектор томонидан тўлиқ текширув ўтказилиб, жабрланувчи олган тан жароҳатларининг оғирлик даражасини аниқлаш учун суд-тиббий экспертиза тайинланган.
Чироқчи туман ИИБ ҳузуридаги тергов бўлинмаси Жиноят кодексининг 277-моддаси 1-қисми (безорилик) билан жиноят ишини қўзғатди. Ушбу моддага кўра, айбдор 20,6 млн сўмдан 41,2 млн сўмгача жарима, 300 соатгача мажбурий жамоат ишлари ёхуд 3 йилгача ахлоқ тузатиш ишлари билан жазоланиши мумкин.