Ўзбекистон Республикасининг 2025 йил 8 августда қабул қилинган ЎРҚ–1080-сонли қонунига мувофиқ, айрим қонун ҳужжатларига интеллектуал мулк объектларини давлат рўйхатидан ўтказиш жараёнини соддалаштирувчи ўзгартириш ва қўшимчалар киритилди.
Эндиликда саноат мулки объекти рўйхатга олингандан сўнг патент талабнома берувчига электрон тизим орқали автоматик равишда юборилади. Илгари эса патент объект рўйхатга олинганлиги ҳақидаги маълумотлар расмий ахборотномада эълон қилинганидан 10 кун ўтгач бериларди.
Янги тартиб патент олиш жараёнини сезиларли даражада тезлаштиради ва тадбиркорлар, ихтирочилар ҳамда муаллифлар учун қулайлик яратади. Бу ўзгаришлар натижасида ишлаб чиқаришдаги инновациялар, илмий ишлар ва янги технологиялар тезроқ ҳуқуқий ҳимояга эга бўлади.
Шу билан бирга, қонунга киритилган қўшимчаларга кўра, интеллектуал мулк объектларига бўлган ҳуқуқларни бузганлик учун жавобгарлик кучайтирилади. Бу чора ҳуқуқ эгалари манфаатларини ишончли ҳимоя қилишга хизмат қилиши кутилмоқда.