The Washington Post манбаларига кўра, Россия президенти Владимир Путин Запорижжя ва Херсон областларида ишғол қилинган ҳудудларни Украинага қайтариш ниятида эмас. Унинг таклифида тўлиқ тинчлик шартномаси эмас, фақат ўт очишни вақтинчалик тўхтатиш назарда тутилган. Кремл шу йўл билан Қримга олиб борувчи қуруқлик йўлини сақлаб қолишни мақсад қилган.
8 август куни АҚШ президенти Доналд Трамп Украинадаги можарони якунлаш жараёнида «ҳудудий алмашинув» масаласи муҳокама этилаётганини айтган эди. Бироқ манбалар Путиннинг бу таклифи Украина қўшинларини Донбассдан чиқаришга қаратилганини, лекин Запорижжя ва Херсондан Россиянинг чиқиши назарда тутилмаганини таъкидлаган. Бу масалада АҚШ президентининг махсус вакили Стив Уиткофф томонидан нотўғри талқин қилингани қайд этилган.
Кремлда ишлаган собиқ юқори лавозимли манбанинг таъкидлашича, Путин сиёсий жиҳатдан Украина тўлиқ маҳв этилгунга қадар урушни давом эттиришни афзал кўради. Шу боис у доимий тинчликка эмас, вақтинчалик ўт очишга қизиқиш билдирмоқда. Бундай келишув, Путиннинг фикрича, Украинада сайловлар ўтказиш имконини яратади, у эса президент Володимир Зеленскийни «ноқонуний» деб ҳисоблайди.
Зеленский 9 август куни яна бир бор ҳеч қандай ҳудудий йўқотишга асосланган келишувга рози бўлмаслигини билдирди. Унинг сўзларига кўра, Украина халқи ўз ерларини босқинчига бериш учун эмас, уларни ҳимоя қилиш учун курашмоқда.
Bloomberg ва The Wall Street Journal манбалари Путин Донбасс ва Қрим бўйича талабларини сақлаб қолишини, аммо Суми, Харкив ва Днипропетровск областларидаги даъволардан воз кечиши мумкинлигини хабар қилди.
Эслатиб ўтамиз, Путин ва Трамп 15 август куни Аляскада учрашиши кутилмоқда.