1 сентябрдан эътиборан Россия Федерациясида хорижий фуқароларнинг рўйхатдан ўтиши, миграция ҳисоби ва меҳнат фаолиятига рухсатномалар бўйича давлат божлари янгича тартибда ундирилади. Бу ҳақда РФ Жамоатчилик палатаси аъзоси Евгений Машаров РИА Новостига маълум қилди.
Янги тартибга кўра, ҳозирча бепул бўлиб турган вақтинчалик яшаш жойи бўйича ҳисобга қўйиш 500 рублга тушади. Виза муддатига боғлиқ бўлмаган ҳолларда вақтинчалик қолиш муддатини узайтириш 1000 рубл этиб белгиланади.
Ишлаш рухсатномасини узайтириш ҳамда патент бериш ёки қайта расмийлаштириш 4200 рублни ташкил этади.
Чет эллик ишчи жалб қилиш рухсатномаси дубликати ёки унга ўзгартиш киритиш учун 2100 рубл тўланади. Яшаш жойи бўйича рўйхатдан ўтказиш хизмати учун бож 420 рублдан 1000 рублга кўтарилади.
Машаровнинг таъкидлашича, бу ўзгаришлар давлат бюджетига қўшимча тушум келтиради ва ноқонуний миграция оқимини камайтиради. «Қонуний ишлайдиган мигрантларга таъсир қилмайди, аммо «хуфиёна» ишлаётганлар сезиларли таъсирини ҳис қилади», — деди у.
Федерал қонунга асосан, РФ Солиқ кодексининг 333.28-моддасига киритилган ўзгаришлар хорижий фуқаролар учун янги давлат божларини жорий қилади. Бу ўзгаришлар 31 июлда имзоланган №271-ФЗ федерал қонун билан тасдиқланган.