AP хабарига кўра, душанба кечаси бир нечта X-постларида Маск Apple’ни сунъий интеллект соҳасида OpenAI’дан бошқа ҳеч бир компаниянинг App Store’да 1-ўринга чиқишига йўл қўймасликда айблади. «Бу мутлақо антимонополия қонунларини бузишдир. xAI шошилинч ҳуқуқий чора кўради», — деб ёзди у.
Маск шу куни аввалроқ App Store’да X’нинг юқори ўринга чиқмагани ҳақида ҳам норозилик билдирди. Унинг таъкидлашича, X — «дунёдаги 1-рақамли янгиликлар иловаси» ва юқори ўринга чиқиши лозим. «Сиёсат-сиёсат ўйнаяпсизми? Нима бўляпти?» — деб сўради Маск.
Ҳозирги рейтингга кўра, OpenAI’нинг ChatGPT иловаси App Store’да биринчи ўринда, Маскнинг Grok иловаси эса бешинчи ўринда турибди. «Apple тарозининг бир тарафини бармоғи билан босмади, балки бутун танасини ташлади!» — деб ёзди Илон Маск.
OpenAI бош директори Сэм Алтман Маскнинг айбловларига шундай жавоб қайтарди: «Илон ўзининг X платформасини ўз манфаатлари учун манипуляция қилиб, рақобатчиларини ва ёқтирмайдиган одамларни зарарга учратишда айбланаётгани ҳақида эшитганимда, бу даъво ажабланарли туюлади».
Алтман ChatGPT ишлаб чиқарувчиси «яхши маҳсулотлар яратишга эътибор қаратган ҳолда» ишини давом эттиришини таъкидлади.
Apple ҳозирча вазият юзасидан изоҳ бермади. Бироқ компания сўнгги йилларда турли антимонополия айбловларига дуч келган. Жорий йил апрелида ЕИнинг 27 мамлакатидан иборат регуляторлар Apple’ни рақобат қоидаларини бузганликда айблаб, 500 млн евро жарима солган. Шунингдек, АҚШда Fortnite яратувчиси Epic Games томонидан берилган антимонополия даъвосида суд Apple’ни суд қарори талабларини бузган, деб топган эди.
Эслатиб ўтамиз, Grok — Илон Маскнинг сунъий интеллект стартапи xAI’га тегишли чатбот иловаси. Аввалроқ Илон Маск болалар учун махсус Baby Grok иловасини яратишни бошлагани ҳақида хабар берган эдик.